KRALENDIJK- Djabièrnè  atardi a tuma lugá un referendum pa trahadónan di Divi Flamingo Beach Hotel por a vota. Esaki a tuma lugá na ofisina di SZW den sentro di siudat. 

Tur trahadó di e hotèl menshoná, por a pasa vota pa saka afó, kuantu trahadó ta deseá di bandoná nan sindikato FEDEBON pa AFBW. A resultá den e votonan ku mayoria a vota pa AFBW 63 voto tabata korektamente yená na fabor di AFBW, 4 tabata inbálido, inkorektamente yená. 

Motibu di e referendum tabata, doño di trabou di trahadónan na Divi Flamingo Beach, no tabata deseá pa trahadónan afiliá na AFBW i pa sali for di e impease mester a tene un referendum pa wak kua sindikato ta representá e mayoria di empleado di e hotèl. 

Marklin Eustachia, a konta e votonan, den presensia di Cherel Kwidama, presidente di AFBW i algun persona mas. 

“Trahadónan a ekspresá ku nan ke un sindikato nobo. Labor a prevalesé. Hustisia a prevalesé. Aki tambe tin kosnan ku no ta korekto. Esaki ta un viktoria di labor. AFBW ta sigui mustra ku e lucha ta pa trahadónan”, asina presidente di AFBW, Cherrel Kwidama a bisa. 

Reklamo

Segun konsehero di AFWB, Ewald Abdul, tabata hopi reklamo riba e doño di trabou. “Kisas awor ku trahadónan di Divi Flamingo Beach Hotel firma CAO nobo, otronan lo puntra dikon nan no”. 

Representantenan di AFBW a bis tambe ku nan ke bai papia ku minister pa bin ku mesun lei di Hulanda, ku si trahadó den un sektor partikular gana un referendum, ku esei ta bai konta pa hinter e sektor.