KRALENDIJK- Den konseho insular tur partido ta di opinion ku no ta korekto pa hotèlnan lokal strobe habitantenan di usa playana lokal. 

E punto a wòrdu tresé dilanti pa e frakshon di Partido Demokrátiko Boneriano (PDB). “Tin mas i mas keho di hendenan lokal ku no por drenta sierto hotèl pa bai landa, ya ku ta bisa nan ku esaki no ta pèrmití. Kon esaki ta posibel, i kiko Kolegio Ehekutivo ta pensa di hasi kontra di esaki”, asina lider di frakshon di PDB, Clark Abraham a puntra. 

Diputado Hennyson Thielman a splika ku e aktitut di e hotèlnan en kestion no ta korekto. “Tur playa di tur hotèl mester ta aksisibel. No a duna ningun hotèl permit pa wanta bishitante lokal afó”, asina Thielman a trese dilanti. 

Thielman a primintí di lo bolbe sinta ku hotèlnan pa mustra nan riba esaki. 

Premia

Lider di MPB, Elvis Tjin Asjoe, a bin ku un otro proposishon. “Mi ta di akuerdo ku mester aktua kontra di e hotèlnan aki”, asina ela bisa. Di otro banda, Tjin Asjoe ta pensa ku por bin tambe ku un estímulo pa ta mas amabel ku hendenan lokal. “Dikon no ta premia e hotèlnan ku si ta yama hendenan lokal un kaluroso bon biní”, asina Tjin Asjoe a puntra. Segun e lider di MPB, meskos ku por bin ku un sistema pa kalifiká kalidat di un hotèl, por bin tambe pa un distinkshon, indikando kon amabel el hotèl en kestion ta ora ta trata di akseso pa hende lokal.