KRALENDIJK – Entidat Públiko Boneiru (OLB) i Cargill Salt Bonaire B.V. (Cargill) una asina yamá Letter of Intent (LOI) pa prolongashon di e tèrmino di èrfpagt duná na e kompania.

Ku e LOI aki, negosashonan a kuminsá tokante e prolongashon di e akuerdonan di èrfpagt pa e terenonnan ku ta usando na Boneiru. Cargill aktualmente tin diferente tereno di èrfpagt na Boneiru, duná na 1964 pa un periodo di sesenta aña. Esaki ta nifiká ku e tèrmino aktual lo ekspirá dia 24 di aprel di e aña benidero.

“OLB ta konsiderá Cargill komo un partner stratégiko i tin komo meta salbaguardiá kontinuidat di produkshon di salu na Boneiru,” asina gobièrnu a bisa den un deklarashon di prensa. Nan ta enfatisá e importansia di tin un kompania di e magnintut di Cargill ku ta un kompania global, operando rònt mundu. 

“Cargill Salt Bonaire ta un di e kuater kompanianan mas grandi mundialmente den komèrsio agro. E salu produsí pa Cargill na Boneiru ta wordu eksportá pa 8 diferente pais i ta esensial pa uso industrial,” segun OLB.

Temporal

E akuerdo firmá awor aki ta prolongá e akuerdonan di èrfpagt aktual pa mínimo un aña te dia 24 di mei 2025, òf te ora nan yega na un akuerdo tokante kondishonnan nobo pa esaki.

Konseho Ehekutivo ta bisa ku esaki ta sigurando kontinuidat di ekstrakshon di salu na Boneiru, empleo, i kontribushon sosio-ekonómiko di Cargill na e isla.