WILLEMSTAD – Den e promé seis lunanan di aña aeropuerto di Kòrsou a atendé alrededor di 650.000 pasahero ku ta yega i bandoná Kòrsou. E kantidat por tabata kasi 900.000 si tur avion tabata yen. E okupashon averahe tabata 74 porshento.

Hulanda ta keda dominá ku un partisipashon di 54 porshento. E kantidat di pasahero pa i for di islanan Karibe den reino tabata djeseis porshento, Merka djestres porshento i Amerika del Sur djes porshento.

Curaçao Airport Partners ta satisfecho ku e resultadonan di tráfiko aéreo positivo i ta antisipá ku koutela un kresementu kontinuo pa e di dos parti di 2022.

Pero CAP ta mira riesgonan si. Entre otro e impakto pandémiko di un posibel variante nobo di corona, pero tambe e guera na Ukraina, inflashon, kosto di bida kresiente, subida di preis di fiul i zeta, pasashi, skarsedat di personal i devaluashon di euro lo tin influensia riba kresementu di tráfiko di pasahero.