KRALENDIJK- Alumnonan di klas H4B di Liseo Boneriano djasabra mainta a mustra kiko nan tin aden, ora nan a organisá un carwash. Entre 7:00 or i 11:00 or nan tabata kla pará pa laba outo i rekoudá sèn pa nan próksimo biahe di estudio pa Hulanda den luna di febrüari 2025. 

Na e momentunan akí nan ta kontando loke a drenta pa medio di e carwash, i esaki lo kontribuí na e gastunan pa pasashi i akomodashon. Durante e biahe di estudio akí, ku ta dura 10 dia, e alumnonan ta bai bishitá diferente ‘hogeschool’ i universidat pa sera konosí ku e sistema di enseñansa hulandes i pa yuda nan na momentu di hasi un eskoho bon balansá pa nan estudio mas avansá.

Grupo

Klas H4B no ta e úniko grupo ku ta partisipá na e biahe akí. En total kuater klas, konsistiendo di tres klas di Havo 4 i un klas di VWO 5, ta biaha pa Hulanda. Banda di e carwash, den e tempu binidero tin mas aktividat planiá pa rekoudá fondo pa kompletá e suma nesesario pa e biahe di estudio. Di antemano e alumnonan i nan dosentenan ta gradisí tur hende ku ta sostené nan ku realisashon di e oportunidat spesial akí.