WILLEMSTAD –  Ámtenarnan na Kòrsou ta haña nan gratifikashon di 1750 florin bruto, pues nèto algu menos, tòg riba nan kuenta di banko. A reservá algu mas ku 10 mion di florin pa esaki.

E gratifikashon ta bini un luna mas lat ku planiá, pasobra gobernadó no tabata konvensí di e motivashon di gobiernu di Kòrsou. Un di e motibunan pa duna un gratifikashon ta e trabou èkstra ku ámtenarnan ta hasi pasobra hopi kolega a sali for di servisio, pero no pasobra a remplasá nan. Otro motibu ku nan a duna gobernadó ta e trabou èkstra pa motibu di koleganan ku a bira malu ku korona i e trabou èkstra pa motibu di reorganisashon.

E sèn èkstra aki ku ta duna pa un biaha so ta konta pa tur ámtenar ku for di 15 di yüni di e aña aki ta den servisio aktivo. Esnan ku ta ekivalente ku personal di gobièrnu tambe ta bini na remarke. Esun ku tin un dispensashon spesial di servisio e aña aki, ku ta suspendé òf ku tin un kastigu disiplinario, no ta haña nada.

Ámtenarnan ku ta traha ménos ta haña e gratifikashon proporshoná segun e kantidat di ora ku a traha.