KRALENDIJK – Riba dia 28 di sèptèmber lo tin un anochi di sine na Isidel Beach Park, kaminda lo mustra e dokumental ‘Piskadó pa semper’. E dokumental akí ta konta e historia di piskadónan Boneriano, nan pashon i e retonan ku nan ta enfrentá. E dokumental tambe ta pone atenshon riba e kolaborashon ku otro hende pa garantisá nan fishi pa futuro. E anochi di sine ta kuminsá 7 ‘or di anochi i entrada ta grátis. 

E dokumental ta un homenahe na peska, unu di e fishinan mas bieu na Boneiru. Peska ta importante pa kultura, ekonomia i provishon di kuminda di e isla. Pero piskadónan ta para dilanti di un tempu difisil. Mundu ta kambia i asina tambe e manera ku piskadónan Boneriano ta hasi nan trabou. Den e dokumental tambe ta pone atenshon riba e formashon di koperativa Piskabon, ku ta representá e piskadónan.

‘Piskadó pa semper’ ta un kolaborashon entre SKAL, Wereld Natuur Fonds i FuhiKuBo. E dokumental ta dediká na Raynel Cecilia, ku a traha ku hopi dedikashon pa dokumentá e sektor di peska na Boneiru. 

Tur hende ta bon biní. No lubidá pa trese bo mes stul. Bebida i snèk ta disponibel den e parke.