WILLEMSTAD – Fondo di Penshon General APC a ordená doño di un pida tereno na Jeremi pa stòp tur aktividat di konstrukshon. Bou di nòmber di Jeremi Ocean Resort e hòmber a kap un pida grandi den baranka pa haña entrada na laman.

E baranka kant’i awa ta propiedat di APC. Den un karta nan no a solamente ordená un paro di konstrukshon, pero tambe nan a pone e kontratista i e doño di e parti patras responsabel pa e daño kousá.

Minister Charles Cooper di Planifikashon Espasial a pidi kadaster pa definí e frontera di tereno di nobo  i ta tratando pa pais bira doño di e terenonan di APC. Asina gobièrnu por supervisá i mantené leinan.

Anto esei ta bai sosodé tambe, Señor Cooper, ku ke evitá ku otronan ta kere ku nan por bai hasi méskos i kere ku nan lo sali ganá, ta bisa.