WILLEMSTAD- Kompania di utilidat Aqualectra na Kòrsou ta sigui ku su proyekto pa instalá asina yamá meternan sabí (smart meters).

Aqualectra a hasi un pousa kòrtiku pa por a evaluá resultado di e proyekto den e bardionan di Abrahamsz i Sapaté. Den e promé fase a konstatá ku e instalashon tin biaha por rekerí mas trabou preparatorio.

Awor aki ta bai sigui ku instalashon na Ser’i Domi i Otrabanda. Habitante di e barionan aki lo risibí bishita di empleado di Aqualectra i/o kontratista ku ta traha pa e kompania, pa wak situashon na kada kas i pa hasi adaptashon na instalashon, si esaki mester ta nesesario.

Retraso

Un faktor ku tambe ta strobando progreso ku e proyekto ta e echo ku provedónan di e smart meternan den eksterior te asina leu no por a kumpli ku tur e demanda di meter nobo ku Aqualectra tin mester.