KRALENDIJK – Komentadó polítiko i historiadó Arthur Sealy ta kere ku Daisy Coffie (M21) no tabata hasi nada mas ku su trabou ora ku e a puntra públikamente tokante e akshonnan di diputado Hennyson Thielman i e kompania HYPE Events Planner.

Sealy a bisa esaki den un kònbersashon ku DCTV. Segun Sealy, ta notabel ku Coffie,entro otro pa simpatisanten di Movimentu di Pueblo (MPB), a ser akusá di atakenan personal riba Thielman.

“Na mi opinion, esaki no tabata un atake personal riba Thielman niun momento, pero mas ku tur riba su kondukta komo diputado den kolégio ehekutivo,” Sealy a bisa. Ku esaki, Sealy ta referí na e echo ku Thielman mes a pidi Gezaghebber Reynold Oleana pa hasi un investigashon tokante e proseso di pèrmit pa Hype Event Planner; un kompania ku di forma ofisialmente ta registrá na nòmber di esposa di Thielman. “Awor ku e investigashon ta mustra ku no tabatin pèrmit, manera Thielman ta parse di a sugerí den konseho insular, ta apropiá pa Coffie hasi pregunta tokante esaki,” Sealy a bisa. E komentadó tambe ta kere ku Thielman a duna informashon inkorekto na konseho insular, lokual normalmente wòrdu konsiderá un piká mortal den polítik. Según Sealy, ta na konseho insular pa disidí si nan ainda tin konfiansa den Thielman komo diputado. “Nada otro ta relevante,” Sealy a bisa.

Krítika riba Gezag

Sealy tambe ta haña ku e krítika ku por a skucha aki aya riba Gezaghebber Oleana, kende a komishoná e investigashon tokante e proseso di permiso, partikularmente repudiabel. “Awor ta ser bisÿ ku gezaghèber Oleana ta arogante i ta kana banda di su sapatu i ku e ta ‘plei sabí’. Segun Sealy e komentarionan aki no ta solamente for di nan lugá, pero tampoko no ta kuadra ku bèrdat. “Oleana no ta un persona ku ta plei ingeligent. E tá un persona sumamente inteligente. Ni Oleana ni Coffie a hasi nada malu, pero nan a kupli ku nan trabou.”