KRALENDIJK – Bou di guia di instruktornan eksperensiá, e aspirantenan di komandante di Brandweerkorps Caribisch Nederland (BKCN) ta desaroyá abilidatnan esensial ku ta nesesario pa por reakshoná di manera efektivo riba situashonnan di emergensia. Entre 12 di ougùstùs i 26 di sèptèmber lo tin ehersisionan na kazèrne di brantwer, na aeropuerto i na diferente sitio públiko.

E ehersisionan ta konsentrá riba kombatimentu di kandela na edifisionan di riesgo, manera kas, skol, restorant, pòmp di gasolin, sentro di kuido pa mucha. Ta tene e ehersisionan aki di forma seku, hasiendo uso di vehíkulonan di bombero i programanan spesial di kòmpiuter. Di e manera aki, e simulashon práktiko ta bira mas realístiko pa e partisipantenan por praktiká bon. E simulashonnan aki ta posibel danki na e kolaborashon i disponibilidat di edifisio- i institushonnan na Boneiru.

Intensivo

Na mart 2024, Brandweerkorps Caribisch Nederland a kuminsá ku un entrenamentu intensivo pa komandante ku gran parti ta tuma lugá na Boneiru. Den luna di mei 2024, e aspirantenan di komandante di Boneiru, Saba i Sint Eustatius a finalisá e promé parti di e entrenamentu ku éksito. Entrante 12 di ougùstùs, e di dos blòk a kuminsá i ta dura te ku fin di òktober 2024, inkluyendo dos siman di treinen intensivo na Hulanda i Alemania.

Brandweerkorps Caribisch Nederland (BKCN) ta pidi komprenshon i sosten di abitantenan durante di e ehersisionan aki. Bo komprenshon i sosten ta di gran importansia miéntras ku e futuro komandantenan ta prepará pa protehá nos komunidat. Huntu nos ta fuerte pa un Hulanda Karibense seif.