WILLEMSTAD – Atrobe e kantidat di studiante ku ta bai studia na Hulanda a baha. Djasabra awor 166 studiante ta sali pa Hulanda bou di guia di Stichting Studiefinanciering Curacao, SSC. Aña pasá e kantidat tabata 181 i 204 studiante a bula na 2020 ku SSC pa Hulanda.

Di e 161 studiantenan 126 ta bai hasi un estudio HBO. Djeskuater studiante ta bai sigui un estudio riba nivel di MBO i 26 studiante ta bai universidat. E siudatnan mas popular pa bai keda ta Den Haag, Rotterdam i Amsterdam.

Djasabra tin dos buelo di KLM ku lo hiba e studiantenan. E promé buelo ta 14.25 i e di dos ta 18.15. Djesseis studiante ta bai mas promé e siman aki.

Na Schiphol un mèntòr lo risibí e studiantenan. E mèntòr a sera konosí kaba virtual ku e studiantenan. Tambe tin studiantenan di SSC, ku a kuminsá nan estudio aña pasa, ku boluntariamente ta duna un man na ora di risibí i guia e studiantenan.

Seguidamente nan lo bai ku bùs nan respektivo siudat. SSC a regla un kamber pa tur studiante ku a pidi pa hasi esei pa nan.