KRALENDIJK- Autor Wilna Groeneboom a skibi un buki impreshonante tokante monumentu di Boneiru. Ku un total di 300 página i 640 pòtret e buki ta e promé publikashon ku ta duna asina tantu informashon tokante edifisionan históriko na nos isla. 

E promé parti di e buki ta duna un bista di shete estilo di konstrukshon lokal, te mas o ménos 1970. Ku esei ta deskribí un periodo di mas o ménos dosshen aña, ilustrá ku foto pretu ku blanku bieu i foto di koló kontemporáneo. Huntu ku kada estilo di konstrukshon tin un pintura tékniko. Banda di deskripshon general pa kada estilo di kontrukshon, hopi biaha kas, e outor literalmente i figurativamente a skohe ún edifisio. Tin biaha hasta ta duna nos un bista paden di kas. 

Funshon

E di dos parti ta konta mas tokante funshon i uso di e edifisionan. E ta trata konstrukshonnan di gobièrnu, manera Fort Oranje, Mangazina di Rei i e hòspital bieu. Tambe e ta trata e diesdos lanthùisnan di Boneiru. Naturalmente misa i skol no por keda afó. E relashon di hopi aña ku laman ta bini dilanti den un parti tokante torno, e plasa di piská pintoresko i algun otro edifisio. Un lista detayá i ilustrá di material di konstrukshon i téknika di konstrukshon ta forma e parti final. Un resúmen históriko ta pone desaroyo di e estilonan di konstrukshon den perspektiva di historia di e isla.

E buki ta destiná pa tur hende ku ta sinti nan mes atraé na e kasnan i otro edifisionan karakterístiko di Boneiru i ke sa mas di eseinan. ‘Monument Bonaire’ pa gran parti ta na dos idioma: hulandes i ingles. Un parti chikitu, pero esensial, di e buki ta skirbí na papiamentu. 

Firma

Wilna Groenenboom ta presentá i firma su buki djárason 27 di òktober for di 19.30 na Captain Don’s Habitat. 

‘Monument Bonaire’ ta un publikashon di Blue Jay Holding BV. A realisá e buki danki na un kontribushon finansiero di Prins Bernhard Cultuurfonds Caribisch Gebied i algun otro spònser. 

Pa mas informashon mira: https://monumentbonaire.nl