ZANDERIJ- Despues di un periodo di kasi dos aña, hopi frustrashon i preokupashon, porfin e aerolínea Surinaamse Luchtvaartmaatschappij (SLM) tin un propio avion atrobe. 

Awor ku tin un avion atrobe ku por wòrdu operá dor di empleadonan pa empleadonan di kompania estatal, porfin por kuminsá traha riba restorashon di e ret di ruta den region Karibe ku buelonan pa entre otro Aruba, Kòrsou, Guyana, Brazil i Miami. 

Te awor aki e kompania tabata dependé riba otro kompanianan di aviashon ku tabata lease nan avion, kompletu ku tripulashon i seguro pa por operá un kantidat di ruta limitá den region. Hopi biaha tabata tin retraso, kanselason den esaki, ku a pone hopi biahero di e kompania fada. 

Amsterdam

Awor ku SLM lo por kuminsá trata riba rekuperashon di e servisio den region, ta falta ainda un avion ku por operá riba e ruta pa Amsterdam. Esaki, histórikamente ta e ruta ku e kompania a gana mas sèn riba dje pa por sigui eksistí. Ku e agregashon di e promé Boeing 737 ta di spera ku SLM lo logra al menos un komienso di rekuperashon di e ret ku antes e kompania tabata sirbi.