Kralendijk- Awe ta Dia di Enfermeria. E dedikashon i pashon ku nos enfermera- i enfermeronan i dunadónan di kuido ta hasi nan trabou kuné ta atmirabel. Pa esaki nan meresé hopi apresio, pasobra na unda nos lo ta sin nos enfermera- i enfermeronan?

Un gesto amabel i un sonrisa kariñoso: esaki ta gradisimentunan chikitu ku diariamente nan ta risibí di nan pashèntnan i klientenan. Pero tin ora ta bon pa duna mas atenshon na profeshonalnan den enfermeria. Dia di Enfermeria dia 12 di mei ta e oportunidat perfekto pa tira lus na abundansia riba nan.

Di dia i anochi enfermera- i enfermeronan i dunadónan di kuido ku tur dedikashon ta trahando pa hasi otronan salú atrobe i pa duna kuido na esunnan ku mester di esaki. Kada enfermera- i enfermero durante su warda ta konfrontá sierto desafionan, ku hasiendo uso di su ekspertisio e por solushoná eksitosamente. Abo mes purba un biaha pa strukturá kuido di vários pashènt, repartí den diferente kamber i kada un ku nan propio remedinan i nesesidat di kuido. I banda di esei enfermera- i enfermeronan ta sòru tambe pa un aserkamentu personal, nan ta duna nan pashèntnan i klientenan atenshon sinsero i nan ta alerta durante henter nan warda.

Empatia

Durante un solo warda un enfermera òf enfermero por enkontrá hopi felisidat pero tambe tristesa profundo. Den kasonan asina mesora ta hasi un apelashon riba tantu e abilidat empátiko komo riba stabilidat emoshonal di e enfermera òf enfermero. Tur esaki ta solamente posibel ku hopi dedikashon, profeshonalidat i perseveransia físiko. Durante henter aña dunadónan di trabou, pashèntnan i klientenan lo mester ekspresá kon balioso nos profeshonalnan den kuido ta. Afortunadamente esaki ta sosodé si, pero ta bon pa awe un biaha mas para èkstra ketu na e enorme dedikashon ku nan ta brinda.

E último periodo difísil durante e krísis ku e vírus di corona un biaha mas a laga nos mira kon grandi nan dedikashon ta, spesialmente ora esaki ta mas nesesario ku nunka. Esaki a eksigí hopi di nos enfermera- i enfermeronan. I nos por konsiderá nos mes felis ku nan amor, motivashon i profeshonalidat!

Nos ta felisitá tur nos enfermera- i enfermeronan i dunadónan di kuido i nos ta deseá nan i tur otro empleado un plasentero Dia di Enfermeria!     

Klek akinan pa mira e vídeo: https://youtu.be/y6r3FWZ3ntc