WILLEMSTAD – Un konsepto di hotèl TUI na Kòrsou. Esei tabata pa hopi tempu kaba haltu riba lista di deseo di e organisashon di biahe riba e isla. I e deseo ei ta bira realidat awor. Ayera a pone e firmanan bou di e kontrakt pa konstrukshon di TUI BLUE Kòrsou na Santa Martha na Bandabou. E hotèl ta haña 300 kamber ku e posibilidat pa ámplia pa 400.

Segun TUI Santa Martha ta e sitio perfekto, ku e ambiente outéntiko i situá na un di e playanan mas bunita di Karibe.

E desaroyo di e hotèl ta den man di famia Vogel i famia Alstede. Famia Alstede, ku resientemente a desaroyá e ofisina di TUI nobo na Willemstad, ta pèrkurá prinsipalmente pa e parti arkitektóniko di e proyekto.

E famia hotelero Vogels di entre otro Avila Beach Hotel i Lions Dive Beach Resort tin e atministrashon na su enkargo. Ta spera di por start ku e proseso di konstrukshon ougùstùs otro aña. I si tur kos kana segun plan TUI BLUE Kòrsou ta habri su portanan fin di 2025.

Hotèlnan TUI BLUE ta e hotèlnan di kalidat haltu di TUI. Tur e hotèlnan aki, ku tur kos  inkluí, ta situá na sitionan trankilo den un ambiente natural i mayoria biaha ta serka di un playa. A desaroyá TUI BLUE pa turistanan ku ta haña un estilo di bida salú importante i ku semper ta en buska di eksperensianan úniko, TUI ta informá.