ORANJESTAD – Banko Sentral di Aruba a oumentá e porsentahe ku bankonan komersial mester mantené komo reserva ku 0,5 punto porsentahe. Bankonan komersial mester mantené un saldo mínimo serka Banko Sentral di Aruba, CBA, ekivalente ku 25,5 porshento di kuentanan di spar di korto durashon di nan klientenan. E sèn ei ta para fiho na Banko Sentral. 

En general ta mira e oumento di obligashon di reserva komo un manera pa frena e kantidat di sèn i dominá inflashon.

Muchu sèn

E desishon pa oumentá e obligashon di reserva ku 0,5 punto porsentahe ta debí spesialmente pasobra e bankonan komersial tin muchu hopi sèn den kaha. Ku e oumento aki Banko Sentral ta spera di redusí e ekseso di likides gradualmente serka tur banko komersial.

Si resultá ku esei no ta logra, e ora ei e persentahe ku e bankonan mester depositá obligatoriamente na Banko Sentral lo sigui subi mas.

Konsekuensianan 

Konsekuensia di e medida di Banko Sentral ta ku bankonan tin ménos sèn disponibel pa duna fiansa na nan klientenan. I konsekuentemente e kantidat di sèn disponibel den ekonomia ta mengua.

Pasobra bankonan tin ménos sèn pa duna fiansa, nan lo apliká tarifanan mas haltu di interes pa fiansanan, lokual lo kondusí na oumento di e tarifa di interes pa konsumidó i empresanan ku ke hasi fiansa.

Bankonan  lo ta mas moderá den dunamentu di fiansa, pasobra nan mester tin un reserva di mas sèn.  Esaki lo por frena dunamentu di fiansa i aktividat ekonómiko.