WILLEMSTAD – Ta bai bon ku Union Monetario di Kòrsou i Sint Maarten. Apesar di un klima eksterno deteriorando pa motibu di entre otro e inflashon haltu persistente, e rekuperashon despues di e pandemia COVID-19 a sigui den 2022. Asina Banko Sentral ta informá.

E rekuperashon ei lo ta mas próspero si e refineria habri na 2024. Den un asina yamá impakto di senario Banko Sentral ta pronostiká ku e kresementu ekonómiko na Kòrsou lo oumentá ku 5.9 porshento.

Esaki ta 3.2 punto porsentahe mas haltu ku den e senario básiko ku ta inkluí e reapertura di e refineria. 

Ounke por konkluí ku reanudashon di e aktividatnan di e refineria na Kòrsou lo mehorá e posibilidatnan ekonómiko riba término mediano konsiderablemente, manera ta resultá for di e oumento ku ta previsibel di e aktividat ekonómiko i empleo, tòg Banko Sentral ta atvertí ku e resultadonan ekonómiko lo dependé di diferente faktor, entre kua e desaroyo di e preisnan internashonal di zeta krudo.

Turismo 

E kresementu aktual na Kòrsou ta bini speshalmente di un oumento di e turismo ku ta keda mas dia. Kòrsou a buk un kresementu ekonómiko real di 5.9 porshento.

Kompará ku e perspektiva di sèptèmber e pronóstiko pa Kòrsou a oumentá ku 0.4 porshento komo konsekuensia di e rekuperashon mas fuerte ku a spera di e turismo ku ta keda mas dia den e di dos mitar di e aña aki.

Ta pronostiká ku e kresementu den 2023 lo debilitá den e union monetario kompleto, komo ku e sirkumstasianan mundialmente lo keda difísil.

Di akuerdo ku e kresementu ekonómiko mas abou ku ta fèrwagt serka e sosionan empresarial mas importante di e union monetario, a redusí e pronóstiko di kresementu pa 2023 di Kòrsou kompará ku e pronóstiko di sèptèmber 2022.

Ounke ku e inflashon lo keda haltu ainda, e pronóstiko ta ku esaki lo baha na 4.5 porshento.