WILLEMSTAD – Barionan di Wishi i Marchena tin despues di ayera awor un propio espasio pa ekshibishon. Gobernador Lucille George-Wout a kòrta sinta ayera pa duna inisio na apertura di e espasio aki den e edifisio Splikami.

Kenneth Hooten ku ta esun ku a tuma e inisiativa pa e identidat kultural di e dos barionan bini huntu, ta di opinion ku pa medio di buska informashon i dokumentashon nan por traspasá e identidat kultural. 

“Ku e sala di ekshibishon nobo, nos por bai presentá obranan di nos bario”. Na e lokalidat aki  artistanan kultural konosí i deskonosí, ku awor ta lantando, por bin duna e identidat forma.

Fundashon Splikami ta un sentro di aktividat edukativo ku atenshon pa e barionan Wishi i Marchena. Un sentro ku e desaroyonan teknológiko mas nobo i banda di esei ‘enseñansa alternativo’ destiná pa e (bario) komunidat. E enseñansa ta mui en espesial dirigí riba e grupo di hóben- i adultonan sin edukashon, sin trabou i vulnerabel, ku di un òf otro manera ta ekskluí di e desaroyonan teknológiko i edukativo nobo.

Adriana’s Academy for Arts and Sciences  i Giovanny Abbath 7.1 tabatin na nan enkargo pa dekorá e espasio di ekshibishon profeshonalmente.