WILLEMSTAD – Capitán Miranda di Uruguay ta yega Kòrsou djasabra 29 di aprel. Manera palabrá e barku di tres master lo drenta entre 8’or i 9’or di mainta.

E barku mester warda pafó di haf riba un lots i un toubot ku lo duna asistensia ora di drenta Annabaai. E barku ta mara na West Werf den Otrabanda, na entrada na altura di Teatro Luna Blou.

Einan e direktiva di Curaçao Sail Foundation, CSF,  ta yama e barku bonbiní, pa despues e kapitan invitá nan na bordo, kaminda lo tin un konferensia di prensa.

E mésun mainta alumnonan di skol ZMLK Myrna Dovale i di asosiashon di mayor Totolika lo haña un rekorido na bordo. E anochi ei e komandante ta ofresé un kòktel na un grupo chikitu di invitado.

Williwood

Djadumingu mainta 30 di aprel pa 8’or di mainta e komandante di e barku  lo pone un krans na e estatua di Pedro Luis Brion riba Brionplein.

CSG ta organisá e attardi ei  entre 6’or i mitar di nuebe di anochi un paseo pa Williwood pa un parti di e tripulashon, kaminda nan mes lo tin un parti di nan músika típiko (Candombe) na nan enkargo.

Djaluna 1 di mei CSF ta ofresé un parti di e tripulashon un rekorido den e museo di katibu na Kurá Hulanda Village.

Públiko

Djadumingu 30 di aprel i djaluna 1 di mei e barku ta habrí entre 10’or di mainta i 6’or di atardi pa públiko por bin bishitá e barku.

Riba ámbos dia partinan di e tripulashon ta haña un rekorido turístiko ku ta finalisá na Mambo i kamninda nan por keda te 5’or atardi.

Despedida

Djamars dia 2 di mei e komandante i su staf huntu ku presidente di CSF, Lucky Ezechiëls ta hasi 9’or di mainta un bishita di kortesia serka gobernador señora Lucille George-Wout den Fort Amsterdam.

Entre mitar di dos i 2’or di e mèrdia ei e komandante i su tripulashon ta tuma despedida atrobe di Kòrsou yamando danki na outoridatnan di haf i CSF pa sigui pa nan siguiente destino den Nort-Amérika.