KRALENDIJK- Un tayer tokante posibilidat di finansiamentu oropeo pa organisashonnan kultural i kreativo na Boneiru ku siman pasá a tuma lugá na Captain Don’s Habitat den koperashon ku International Desk Bonaire i Rijksdienst Caribisch Nederland a wòrdu basta bon bishitá.

E públiko presente, entre nan representantenan di entre otro Museo Terramar, BONAI Fund, Kas di Kurason i Fundashon Akseso, tabata interesá en e posibilidatnan i a hasi vários pregunta.

E tayer a kuminsá ku un diskurso di apertura di gezaghèber interino Nolly Oleana. Despues a sigui un presentashon amplio di Albert Meijer (konsehero na Creative Europe Desk NL) i Jelle Burggraaff (hefe di Mobilidat i Konseho na Creative Europe Desk NL). E presentenan a haña informashon tokante entre otro fondonan pa e sektor kultural i kua ta e posibilidatnan di kolaborashon ku tin ku otro islanan i paisnan i teritorionan ultramar. Diputado Nina den Heyer a klousurá e tayer.  

Mas informashon 

Den futuro serkano DutchCulture i Creative Europe Desk NL lo organisá vários evento online i offline pa di e manera ei keda informá organisashonnan kultural i kreativo na Boneiru i si nan ta deseá esei, duna nan guia. Pa mas informashon por tuma kontakto ku Albert Meijer via [email protected] i/òf  Jelle Burggraaff via [email protected]