KRALENDIJK- Manera Awor.nu ta komprondé Kolegio Ehekutivo djaweps a manda un karta pa sekretario di estado, Alexander van Huffelen, tokante kambionan di tarifanan di impuesto riba entrada. 

Segun informashon di Awor.nu, den e karta Kolegio Ehekutivo ta nota ku nan no a wòrdu informá tokante kambio den tarifanan di impuesto i mester a tende for di esaki den prensa lokal. Aunke BC ta nota ku a komprondé ku e a sali un publikashon den Staatscourant dia 28 di desèmber, nan no ta konsiderá esaki suficiente. 

Pobreza

Banda di esei Kolegio Ehekutivo tambe ta mustra riba e echo ku e kambionan den tarifa, prinsipalmente e suma riba kual no ta paga impuesto i e redukshon di e asina ouderentoeslag, ta parse di bai kontra di esfuersonan pa redusí pobresa riba nos islanan. 

Tambe ta mustra riba e echo ku gabinete Rutte IV, despues di su instalashon a primintí ku niun ciudadano lo bai atrás den nan forsa di compra. Pero ku e medidanan nobo, definitivamente, kasi tur ciudadano ta bai paga mas na impuesto ku tabata e kas te ku fin di aña 2021.