KRALENDIJK –  Den nos rúbrika ‘Bèk na Boneiru’ nos ta sigui personanan Boneriano ku a lanta na Boneiru, a traha òf studia den eksterior, pero despues ta bini bèk atrobe. Den e di nuebe seri nos a papia ku Christopher Abdul. El a hasi karera na diferente ministerio na Hulanda i 1 di sèptèmber e ta kuminsá na Rijksdienst Caribisch Nederland. Abo sa, òf konosé un hende ku un storia úniko? Duna redakshon un tep.

Nos a topa Christopher Abdul ku su pareha Elise Winklaar i nan yunan riba un dushi atardi na Sebastian’s Beach na Boneiru. Christopher, òf Chris, a kaba di yega for di Hulanda. Abdul tin un siman pa aklamatisá ku su pareha i su yunan. Despues ta kuminsá un bunita aventura p’e.  E hóben di 28 aña ta kuminsá komo sekretario ehekutivo di e direktor na Rijksdienst Caribisch Nederland (RCN). E young professional ta ansioso pa regresá su isla natal i pa kontribuí na e sosiedat.

Un biahe di dos mundu 

Christopher Abdul a nase na Boneiru, pero a bai Hulanda ku su famia na edat di seis aña. “Mi a biba seis aña na Hulanda i despues a move bèk pa Boneiru,” Abdul ta konta. “Aki mi a sigui skol básiko i skol sekundario te ku mi 17 aña. Despues mi a bolbe bai Hulanda pa mi estudio.”

Na Hulanda Abdul a studia Lei internashonal i Europeo na Haagse Hogeschool. El a hasi esaki ku éksito. Hopi lihé tabata notabel ku Abdul, ku e tempu ei ainda tabata hopi yòn, tabatin ambishonnan internashonal. “Mi plan tabata pa sigui un maestria na London òf Vienna. Lástimamente corona a dal aden,” e ta splika. Esaki a pone un paro aprupto na su plan pa bai studia den estranheria. Na lugá di esei el a bai traha na Ministerio di Finansas i despues na Ministerio di Asuntunan Interior. “For di mucha kaba mi tabatin afinidat i interes pa asuntunan ku tabata tumando lugá den sektor públiko i rondó di dje. Ora mi a bini den kontakto ku esaki den e ròl riba tereno profeshonal ku mi tabatin den e tim di corona pa asuntunan fiskal tambe na Ministerio di Finansas, esaki a enkurashá mi pa kontinuá mi biahe den e direkshon ei,” segun Abdul. 

E yamada di Boneiru 

Ounke Abdul a sigui desaroyá su mes eksitosamente na Hulanda, Boneiru a keda semper den su pensamentu. “Tur dia mientras mi tabata biba na Hulanda, mi tabata sigui tur kos ku ta pasando akinan. Mi tabatin kontakto tambe hopi ku mi tata Henk, ku ta biba aki riba e isla i ta manehá e empresa Henk Transfer en Tours. Mi tabata kompartí kuné e notisianan ku mi tabata lesa,” e ta bisa. “Mi kurason ta aki, i semper mi kier a bolbe bèk ku eksperensia pa realmente kontribuí na desaroyo di e isla. No pa un aventura temporal. Nò, mi ke keda aki ku mi pareha i mi yunan.”

E desishon pa regresá a aselerá pa motibu di un suseso personal. “Komienso di e aña aki mi mama a fayesé, i esei a ponemi pensa,” Abdul ta konta emoshonalmente. “Semper mi tabata trahando plannan pa término largu, pero mi a disidí ku awor mi ke tuma e paso pa bai Boneiru bèk. E isla ta un paraiso p’ami. Bida ta kòrtiku i mi ke pasa mi tempu akinan.”

Traha pa futuro di Boneiru 

Awor ku Abdul ta bèk el a aseptá un posishon na RCN komo sekretario ehekutivo di e direktor. E lo okupá su mes ku entre otro maneho di organisashon stratégiko i e negosashonna di CAO. “Mi no ta mira e transishon di Hulanda pa Boneiru komo un paso atras, pero hústamente komo un manera pa bini bèk ku eksperensia i duna un kontribushon bèrdadero. E ta pa mi un reunifikashon di e dos mundunan ku a formami. Hopi bunita ta ku mi por uza eksperensianan di trabou na Den Haag riba mi isla natal,” e ta enfatisá.

Abdul tin un vishon riba desaroyo i kresementu deseá pa Boneiru. “E isla ta un paraiso, pero mester protehá e paraiso si,” e ta splika. Vishon riba desaroyo i kresementu ta hopi importante. Pobresa ta un problema grandi i e preisnan haltu ta hasi’é difísil pa hendenan lokal. Ta kosnan ku mi ta sinti te den mi kurason.”

E ta boga pa atenshon èkstra pa hendenan lokal pa konstruí òf kumpra un kas. Tambe e ke mira algu sosodé ku e preisnan kresiente di importashon. “Mester sondea maneranan pa kontrolá e preisnan di importashon mihó i pa wak posibilidatnan di importashon regional. Merkadonan manera Mexico, Repúblika di Sto Domingo, Colombia, Brazil ta interesante. Asina nos ta ménos dependiente di preisnan di produkto ku ta bini di Hulanda i Merka. Ta bira tempu pa nos bai buska mas serka di kas,” e ta proponé. Un terminal di karga ku ta prepará pa futuro ta hunga segun Abdul un papel importante den esaki.

Famia tin un ròl importante

Banda di su karera famia ta un enfoke importante pa Abdul. “Mi ta un hende di famia i gusta pa ta den kompania di amigu i famia,” e ta bisa. Elise Winklaar, su pareha, ta agregá: “Ta bunita ku nos tur dos por  kontinuá nos karera akinan i ku nos por lanta nos yunan na Boneiru.” Winklaar ta kuminsá komo gerente di resepshon na Plaza Beach Resort.

Abdul ta sinti e regreso na Boneiru hustamente manera un chèns pa hasi algu positivo pa e isla ku semper el a konsiderá komo su kas. “Nos mester di tur hende: empresarionan, Hulandesnan Europeo, yunan di tera i hendenan di den region. E ta un koperashon,” e ta bisa konvensí. 

E kompromiso ku e isla 

Ounke e no tin aspirashon polítiko, Abdul ke kontribuí na desaroyo di Boneiru saliendo for di su ròl aktual na RCN. “Mi sensibilidat lokal i eksperensia na Den Haag ta yudami den esaki,” e ta bisa. Su kompromiso ku e isla ta evidente. Pa Abdul e ta bai kuminsá otro siman di bèrdè bèrdè. “Ku mi konosementu i eksperensia mi ta spera di yuda e isla den un desaroyo duradero i inklusivo”.