KRALENDIJK – Den nos rúbrika ‘Bèk na Boneiru’ nos ta sigui personanan Boneriano ku a lanta na Boneiru, a traha òf studia den eksterior, pero despues ta bini bèk atrobe. Den e di djesun seri nos a papia ku Giordano Molina. E tin mei aña trahando komo Direktor di Operashon na Aeropuerto Internashonal Flamingo (BIA). Abo sa, òf konosé un hende ku un storia úniko? Tep redakshon.

Giordano Molina a lanta na Boneiru. El a pasa su hubentut na Rincon i despues tambe na Playa (Kralendijk), kaminda e no a siña konosé solamente e kultura bibu di e isla, pero tambe a desaroyá su pashon pa deporte. “Ku seis aña mi a kuminsá praktiká yudo,” Molina ta konta. “Algun siman atras e klup di yudo di Rincon, kaminda mi a krese, a selebrá nan 50 aña di eksistensia, loke a ponemi kòrda mi djesdos aña komo yudoka. Riba e isla aki mi a haña mi faha maron, loke ta nèt bou di e faha pretu.”

Pashon pa aviashon 

Ounke yudo a hunga un papel importante den su hubentut, Molina su pashon mas grandi tabata aviashon. “Mi tata tabata traha na brantwer na aeropuerto i mi tabata pasa basta tempu na aeropuerto,” e ta kòrda. “Semper mi kier a bira pilot. E bista di avionnan ku ta subi i baha tabata mágiko p’ami.”

Despues di su skol sekundario na Boneiru, kaminda el a sobresalí den siensia, Molina a sali pa Hulanda pa studia teknologia di aviashon na Haarlem. “Mi a skohe un estudio di HBO komo back-up pa mi ambishon pa bira pilot,” e ta splika. “Despues di e akontesimentunan di 9/11 mi a realisá ku siguridat tabata importante. Pa e motibu aki mi no a hasi e estudio ku lo a hasimi pilot.”

Molina su karera a hib’é diferente kaminda, entre nan Kòrsou, kaminda el a traha pa DAE i Insel Air. “Na Inselair nos a krese di seis pa 22 destinashon,” e ta konta ku orguyo. Su eksperensia den aviashon a ekstendé ora e tabata supervisá operashonnan na aeropuerto di Curaçao Airport Holding.

Duna bèk

Na 2024 Molina a bini Boneiru bèk, guiá pa e deseo pa duna algu bèk na su isla natal. “Mi ke kontribuí na kresementu di e isla. Boneiru tin asina hopi potensial,” e ta bisa.  Su ròl na BIA ta ofresé e oportunidat pa transformá e aeropuerto den un porta di entrada modèrno i efisiente ku e isla meresé.

Molina ta mira un futuro su dilanti kaminda e aeropuerto di Boneiru no ta solamente un sentro pa buelonan internashonal, pero tambe un tarheta di bishita pa e isla. “Nos mester hasi e aeropuerto prepará pa futuro,” e ta enfatisá. Esaki no ta nifiká solamente ámpliashon di e kapasidatnan pa atendé durante e oranan di tráfiko intensivo, pero tambe mehorá e eksperensia di e pasaheronan i modernisá e fasilidatnan.

Famia ta esensial 

Banda di su trabou fe ta sentral den famia di Molina. E tabata embolbí por ehèmpel den trabou sosial, manera hiba e palabra di Dios pa grandinan. E misa di San Bernardo tin un ròl importante den bida di Molina. Tambe e tabata embolbí ku gruponan di orashon, kaminda e tabata duna guia spiritual na mucha. E ta enfatisá ku e aktividatnan aki tabata un  parti importante i bunita di su bida, i e fe  ei ta hunga ainda un papel importante den su bida.

Banda di su ambishonnan profeshonal i  fe tin un motibu fuerte pa Molina su regreso pa Boneiru. “Famia ta nifiká tur kos p’ami,” e ta bisa. “Mi ke ta embolbí den momentonan importante i no para wak so di distansia.”

Su yu muhé, ku a muda pa Boneiru huntu ku su kasá, ta hunga un ròl grandi den su desishon pa bini bèk. “Ta dushi pa mir’é krese den un ambiente ku mi konosé i ta apresiá,” e ta agregá.

E isla a kambia 

Molina ta remarká ku hopi a kambia konsiderablemente e último dékadanan. “E isla a bira mas bibitu, loke ta atraktivo pa profeshonalnan hóben manera ami,” e ta bisa. Ounke e ta komprendé e nostalgia di esnan ku ta sinti falta di e Boneiru trankil di ántes, e ta yama bonbiní na e adelanto i e dinamismo ku e isla ta ofresé awor.