WILLEMSTAD – E belerista Yu di Kòrsou Odile van Aanholt a prolongá huntu ku Annette Duets su titulo mundial den e 49erFX. Fin di aña pasá Van Aanholt a konkistá e título mundial na Oman huntu ku Elise de Ruijter den ‘skiffboot’.

Van Aanholt (24) i Duetz (29) a disidí na kuminsamentu di e aña aki pa drenta huntu den e boto. Esaki a duna nan mésora e título mundial na St. Margarets Bay na Halifax, situá na e kosta oriental Kanades. E beleristanan Hulandes a sigurá oro den e kareda pa medaya, kaminda nan a finalisá na di tres lugá. Nan kompetidónan Sueko a finalisá último.

“Aki tin dos kampion mundial pará sumamente kontentu ku bandera Hulandes. Tabata emoshonante”, Van Aanholt a bisa. “Nos no tabatin un kompetensia grandioso awe mainta, pues tabatin tiki punto di diferensia entre Suesia i nos. Nos mester a hasi esfuerso durante e último kareda pa medaya. Esei a logra, nos a eksperensiá un kareda hopi bon i ta sumamente orguyoso. Nos ta hopi kontentu i tin hopi interes pa futuro.”