KRALENDIJK – Preisnan den supermerkadonan ta birando demasiado karu. Habitantenan lokal, pero tambe turistanan di e isla ta keha di e preisnan ku ta subiendo bárbaro. Riba djasabra si por kumpra produktonan (lokal) mas barata. Habitantenan ta bende riba djasabra nan propio produktonan entre Warehouse i Selibon na Kaya Industria. Un di e empresarionan aki ta Onnie Emerencianan. E meta di e empresario ta evidente: “Mi ke bende fruta mas barata posibel ku hendenan lokal”.

“Wak, esaki ta masoménos un kilo”, Onnie Emerenciana ta bisa mientras e ta mustra un saku ku djesdos parchita. Den su surtido e tin lamunchi, parchita, patia, papaya i tin biaha mango. E empresario ta kumpra su frutanan via un intermediario ku di su banda ta kumpra nan dirèkt serka e barkunan Venezolano. Promé ku e krísis di corona habitantenan di e isla por a negoshá dirèkt ku empresarionan Venezolano. Ku e reglanan aktual nan no por hasi esei mas. Den un entrevista anterior ku diputado Abraham el a bisa Bonaire.nu: “Na Boneiru komersiantenan no tin mag di negoshá dirèkt ku e konsumidó. Esei ta pa motibu ku e komersiante no tin un empresa inskribí na Boneiru”. E empresarionan Venezolano ku ke bende nan produktonan na Boneiru mester atendé ku un intemediario. Nan ta bende e produktonan despues ku e supermerkadonan. Den e artikulo tin pará ku ta pa e motibu aki e preisnan tin biaha ta subi eksageradamente.

Awor e resibu ta bini. Emerencianan ta pidi 6 dòler pa e parchitanan (mas o ménos $2,47 pa kilo) i 1,50 dòler pa 5 lamunchi (ta mas o ménos $3,17 pa kilo). Nos ta puntra nos mes kuantu e supermerkadonan na Boneiru ta pidi en realidat pa produktonan simlar?

Habitantenan lokal ta bende nan produktonan riba djasabra entre Warehouse i Selibon.

Hopi diferensia den preis na supermerkadonan 

BonDiGro ta bende komo supermerkado e lamunchinan mas barata riba e isla. Nan ta pidi $3,43 pa kilo. Papaya ta mihó bo kumpr’é na Warehouse. Parchita tambe ta relativamente mas barata einan. Remarkabel ta ku apesar di su surtido ámplio van den Tweel no ta bende papaya i parchita.

E supermerkadonan Chines ta esunnan mas karu. Supermerkado Wing Cheung na Kaya Korona ta pidi mas o ménos $6,48 pa kilo di lamunchi. E supermerkado na Kaya Nikiboko Nort tin e preis mas haltu pa kilo di papaya, $3,95 pa kilo. Ademas bo mester wak bon. Tin hopi parchita i otro fruta putrí den rèkinan. Famoso na Kaya Industria tin e preis mas karu pa parchita. Nan ta pidi $4,94 pa kilo.

* Aki no ta pone e preis na e produkto. Ta pisa e produkto na kaha i einan ta duna un preis.

Bende barata 

No ta bèrdura i fruta so por kumpra riba djasabra. Tambe tin bendedó ku ta bende mata, bibida, otro kuminda lokal i asta panelnan solar. Joanny Lara tambe ta para na e marshe riba djasabra. Lara, ku ta desendiente di Venezuela, ta laga sa: “Mi ta bende diferente sorto di bolo akinan. Ta produktonan lokal ku nos ta kome hopi na Venezuela. Hulandesnan no konosé esakinan i mester kustumbrá. Sinembargo mi ta mira ku hopi ke purb’é. Nan gusta e eksperensia pa purba algu nobo. Mi gusta laga e hendenan di aki wak ki tipo di bolo nos ta traha na Venezuela”.

Pa Emerenciana, pero tambe pa e otro bendedónan lokal ku ta bende djasabra nan diferente produktonan den nan tènt, e meta prinsipal no ta pa pidi e preis máksimo: “Mi meta ta pa bende fruta barata ku hendenan lokal. Mi ke yuda nan. Sierto produkto mi ta kumpra via bendedónan Venezolano. Otro produkto mi mes ta planta i bende akinan”.

Den tempu benidero lo bai bini komparashon di preis pa otro gruponan di produkto tambe.