KRALENDIJK- Bonaire International Airport (BIA) a logra finalisá e proseso di kompra di vários tereno ku ta di importansia pa e aeropuerto.

Segun direktero interino, Jos Hillen, for di 10/10/10 a traha duru riba ekspanshon i mihó siguridat pa aeropuerto. Asina a traha un barera rondó di hinter e tereno di aeropuerto. Ku esaki sinembargo, a enserá tambe diferente pida tereno ku tabata propiedat di otro doño di tereno.

Segun Hillen, pa basta tempu kaba tabata negoshá ku doño di e terenonan aki, pa por yega na un akuerdo di kompra. Tambe a hasi vários trabou preparativo pa por yega na e traspaso di e terenonan konserní.

Hillen a sigui splika ku for di dia ku tabata tin un hunta nobo di komisario i tambe gerensia nobo, e proseso a akselerá. “A trata pa yega na un akuerdo pa sea kumpra e terenonan aki, òf pa yega na un trokamentu di tereno, kaminda hende a haña otro tereno pa kompensá pa esnan ku a keda enserá den e kurá di BIA”. Den e proseso BIA a haña ayudo di vários eksperto pa por a yega na akuerdonan ku ta hustu pa tur partido konserní.

Akuerdo

For di den yanüari 2022 a logra yega na akuerdo ku dos doño di tereno pa kompra di un total di 16 hektar. Ayera, djaluna dia 7 di mart, BIA a logra keda kla ku e traspaso ofisial di e terenonan konserní, huntu ku e eskpertonan di Kadaster di Boneiru.

Segun Hillen a splika, falta pa yega na un akuerdo i traspaso di masomenos 30% mas di e tereno ku ta keda enserá pa BIA su kurá. E esfuersonan pa yega na un akuerdo ku e otro doñonan di tereno ta siguiendo.