KRALENDIJK- Entrante e siman ku ta bin aki, biaheronan for di Boneiru ku ke biaha bai Kòrsou bin bèk, mester tene kuenta ku un gastu adishonal di masomenos 249 dòler pa e diferente tèstnan ku mester hasi. 

Esaki ta konsekuensia di e echo ku Kòrsou a pone Boneiru den kategoria di paisnan di riesgo hopi haltu. 

Sin antes un biahero por a biaha ku un tèst antígeno ku ta kosta aktualmente masomenos 50 dòler, esaki ta subi bai masomenos 125 dòler pasombra awor mester hasi un tèst di PCR kompletu, ku ta mas karu ku e tèst antígeno. 

Dor di e kategorisashon aki, e biahero ta obligá tambe pa hasi un tèst antígeno riba e di 3 dia despues ku ela yega na Kòrsou. E tèst aki ta obligatorio. Pa por biaha bèk pa Boneiru, mester pasa otro tèst di PCR kompletu, ku na Kòrsou en general ta kosta 150 florin, o sea 84 dòler. 

Eksepshon

Solamente pasahero ku ta biaha bai Kòrsou dentro di 48 ora por skapa di e gastunan adishonal aki. 

Esaki pa motibu ku Boneiru ta permití biahero di sali i drenta bèk ku e mesun resultado di PCR, basta e no ta mas ku 48 ora bieu. 

E gastu pa tèst ta bin riba e gastu di pasashi, ku pa hopi hende ta haltu kaba ku un preis promedio di masomenos 170 dòler bai bin. Eaki ta nifiká ku pa mayoria hende un biahe di algun dia pa Kòrsou lo sali masomenos 419 dòler. 

Por spera ku e montantenan astronómiko aki, lo tin un impakto negativo riba e tráfiko entre Boneiru ku Kòrsou.