Kralendijk- For di dia promé di yüni no tin obligashon di bai hasi kuarentena sentral na Buddy Dive Resort. Por hasi esaki na kas, si sirkunstansia na kas ta permití esaki.

Esaki ta un di e medidanan di suavisashon ku gezaghèber Edison Rijna a anunsiá ayera. Hopi hende tabata tin problema ku e obligashon di karentena sentral, dor ku esaki tabata trese basta gastu kun’e, ya ku e gastu di estadia mester a wòrdu pagá dor di e pasahero mes.

Obligashon

Ora yega for di un pais di riesgo hopi haltu, ta keda eksistí e obligashon di hasi un karentena na kas. Esaki tin un durashson di 10 dia. Sinembargo, despues di 5 dia por bai hasi un tèst di PCR. Si esaki sali negativo, por sali for di e karentena. Hende ku no ta deseá di hasi esaki, lo mester keda den karentena na kas pa 10 dia na tur.

E obligashon pa hasi kuarentena ta konta tambe pa pasahero ku ta biaha via di Aruba òf Kòrsou si yega for di un pais ku ta kalifiká komo di ‘riesgo haltu’.