WILLEMSTAD – Lanthùis Bloemhof tin e promé banki pa kurá kompletamente resiklá ku ta trahá na Kòrsou ku 22.000 dòpi di plèstik ku a tira afó. Limpi Recycling a traha e muebel pa kurá. 

Segun e fabrikantenan e banki ta resultado di un proseso di diseño i produkshon ku a desaroyá i tèst kuidadoso,  mientrastantu Limpi Recycling tin mas ku seis aña di eksperensia trahando ku nan produkto básiko mas prinsipal: sushi di plèstik.

Debrah i Mitchell, fundadónan di e kompania, no ta solamente diseñadó di produkto, pero tin tambe eksperensia tékniko pa traha ku e material.

E kompania tin mientrastantu diferente mashin pa fragmentá plèstik i proses’é den un masa útil di moda ku e plèstik ta haña un di dos bida den un forma nobo.

Diferente di e mashinnan aki ta nan mes a traha na midí ku piesanan eksistente òf adaptá na loke e produkshon di e empresa ta rekerí.

Meskla

E banki di kurá na Lanthùis Bloemhof ta konsistí di un meskla di dòpi di tur koló, di manera ku e koló shinishi blou ta sali dilanti. E resultado ta un muebel di kurá ku ta resistente kontra awa i komehein.

E fabrikantenan ke traha tambe muebel di kolónan spesífiko, pero e ora ei mester surti e dòpinan promé na koló i esei ta tuma hopi tempu. Limpi Recycling ta desaroyando awor un mashin ku ta surti e dòpinan outomátikamente na koló.

Limpi Recycling ta entregá mientrastantu rekuerdonan resiklá na diferente sitio na Kòrsou i tambe otro produkto di sushi di plèstik di Kòrsou. Mientrastantu a bini dos kolaboradó aserka pa produkshon i diseño.

Medioambiente

Debrah Nijdam i Mitchell Lammering a lanta Limpi Recycling na 2017. Àmbos a studia diseño di produkto na Hulanda. Despues di nan estudio nan a disidí di regresá Debrah su isla natal pa wak si nan por a lanta algu aki nan ku nan estudio.

Loke a kuminsá komo un proyekto di resiklahe pa seis luna a krese bira na aña 2023 un empresa ku un kurason konsiente pa medioambiente. Mientrastantu no ta Debrah i Mitchell so ta traha pa Limpi Recycling. Ruwensly Wilson ta traha den produkshon i Gianninah de Jongh a reforsá e tim komo kolaboradó vèrsá den produkshon i diseño.