GEORGETOWN – E bodybuilder Boneriano Naeem Tahiru a representá Boneiru resientemente ku orguyo na e prestigioso Kampionato di Bodybuilding IFBB na Guyana 2024.  E evento, ku a tuma lugá di 17 te 20 di òktober den e Sentro Kultural Nashonal na Georgetown, a trese mas ku 250 partisipante di mas ku 20 pais huntu, di manera ku e tabata un di e kampionatonan di bodybuilding mas grandi di region.

Despues di e evento Tahiru a gradisí via media sosial pa e sosten di su kompatriotanan. “Mi ke tuma un ratu pa ekspresá mi mas sinsero gratitut na e tremendo personanan di Boneiru pa nan sosten inkebrantabel i orashonnan mientras mi por a prepará mi mes pa representá nos bunita isla na e Kampionato di Bodybuildng IFBB na Guyana 2024,” el a bisa despues di e kompetensia.

Ounke e kompetensia tabata intenso, Tahiru a sa di hasi impreshon ku su determinashon i presentashon físiko. El a mira su partisipashon mas ku un prestashon personal. “Huntu nos a tene e bandera di Boneiru haltu i mi ta honrá ku mi por a para riba e podio komo boso representante. Danki pa boso konfiansa den mi.”