KRALENDIJK – Esnan ku ta hasi bishita na e refugio di buriku na Boneiru, tin e oportunidat pa kumpra rekuerdo einan, ku no solamente ta sirbi komo un rekuerdo di Donkey Sanctuary Bonaire, pero tambe ta kontribuí na mantenshon di e refugio.

Un artíkulo den e tienda ku ta yama atenshon ta un rèki yen di pòpchi di buriku kolorido i alegre. Kurioso pa sa e historia trás di e pòpchinan aki, ABC online media a bai buska e persona ku ta traha esakinan.

Esaki ta resultá di ta e boluntario Joyce Bos. Bos ta bishitando e isla ya pa siete aña i ku esaki tambe  e refugio di buriku, un idea di Marina Melis, e ‘mama di buriku’ inofisial di e isla.

“Ora mi a bishitá Boneiru pa promé biaha shete aña pasá, i mi a bishitá Donkey Sanctuary, mi a keda hopi impreshoná ku loke mi a mira ayanan. Bèk na Hulanda, mi tabata blo sinta pensa kiko mi tambe lo por hasi pa e burikunan. Esei a kondusí na e idea pa hak burikunan, ku mi lo por a bende i e sèn ku esei ta generá mi lo por a manda pa yuda ku kuido di e burikunan”.

Pensando bèk riba kon tur kos a kuminsá, Bos mes tin ku hari. “Bo mester sa ku nunka den bida mi a yega di hak promé ku mi a kuminsá ku e proyekto aki.  Mi no tabata un idea mes, kon ta hasi esaki. Pero un dia mi a simplemente kuminsá purba numa. Mi a kumpra un patronchi i asina mi a kuminsá hak mi promé buriku”. Segun Bos, e promé burikunan ainda no tabata parse esnan ku e ta trahando awendia. Pero segun tempu tabata pasa, ela haña mas eksperensia ku esaki.  

“Pa bisa berdat, te ainda ni dos buriku ta sali eksaktamente meskos. Un tin brasa un tiki mas largu i otro tin pia un tiki mas grandi.” Den transkurso di aña, Bos a hak un par di shen burik. Durante su bishita di tur aña na Boneiru, e ta trese un maleta kompletamente yená ku pòpchi di buriku. “Den un maleta tin masomenos 15 pòpchi ta pas,” Bos ta splika. Otro hende ku Bos konosé biaha pa Boneiru nan tambe ta haña e súplika pa hiba maske ta un par di pòpchi. “Pa Marina”.

Material

Banda di kumpra e popchinan durante un bishita na Donkey Sanctuary, nan por wòrdu pidí direktamente serka Bos mes. Asina e ta bende vários di nan na Hulanda mes tambe. “Pero tur e sèn di benta ta bai pa e burikunan,” Bos ta bisa, kende ta paga pa e material nesesario for di su mesun saku. E pòpchinan ta hopi popular serka turista, voral merikano. Bos tin biaha ta risibí pòtret di hende ku a kumpra su pòpchinan pa hiba kas bèk.

Si Bos traha duru tras di otro, e por keda kla ku un pòpchi den masomenos 4 dia. “Ora mi tabata traha ainda na e servisio di ambulans, esaki tabata un forma di distraé mi mente for di e trabou. Hasiendo e trabou aki, bo ta mira basta kos ferfelu riba un dia di trabou. Pero trahamentu riba e pòpchinan ta un manera perfekto pa kita bo pensamentu pa kosnan ferfelu òf tristu, pa pensa un ratu riba kosnan alegre i positivo, asina Bos a bisa.

E pòpchinan ta seif tambe pa mucha chikitu i asta beibi baby. “E pòpchinan tin wowo ku ta seif pa mucha; muchanan no por saka nan, pa por hinka esakinan den nan boka òf guli nan”.  

Tin biaha, Bos ta risibí petishonnan speshal. “Asina poko dia ei, un persona a yama mi pa pidi un pòpchi den e kolónan di su empresa. Esaki lo bira e maskota di e organisashon, den e kolónan di e logo.

Bos ainda no a kansa di trahamentu di e pòpchinan. Banda di esaki e mes ta yuda tambe ku e trabounan na Donkey Sanktuary. “Ora mi ta na Boneiru, mi ta bai yuda kasi tur mainta. Mi ta stima e trabou aki.”

Tienda

‘Mama di buriku’ Marina ku un yu di burki resien nasé. Pòtret: Donkey Sanctuary Bonaire.

Kualke hende ku tin interes pa kumpra un di e pòpchinan di Joyce Bos por pasa na e tienda di Donkey Sanctuary na Kaya Ir. Statius van Eps, tras di aeropuerto riba kaminda pa Sorobon. Na tur ya tin manera un 375 buriku ku ta biba na e refugio.

Un bishita na Donkey Sanctuary semper ta bale la pena, asta pa hende ku a yega di bai kaba. E refugio ta habri tur dia di 10 ‘or di mainta, te 5 ‘or di atardi. Entrada ta posibel te ku 4 ‘or di atardi. Den e refugio por kore ku outo, golfcart, skuter òf baiskel. Tambe ta posibel pa kana rònt. Quads sinembargo no ta permití den e refugio.

E preis di entrada ta 9 dòler pa adulto. Muchanan te ku 12 aña ta paga solamente 4 dòler 50. Pa mas informashon por bai bishita www.donkeysanctuary.org