Ya restorantnan ta preparando pa e di tres edishon di Bonaire Culinair. Dia 23 di sèptèmber e evento di 15 dia aki ta ranka sali pa finalisá dia 7 di òktober. Bonaire Culinair ta e oportunidat úniko pa deskubrí e variedat di restorant riba nos isla den un solo evento. Nobo e biaha aki ta e asina yamá “lunch rooms” i “food trucks”.    

Restorantnan ku ta partisipá, “lunch rooms” i “food truck” a krea un menu ku preis fiho. Restorantnan ta ofresé un sena di 3 parti pa $33. “Lunch rooms” ta ofresé un menu di lunch pa $22 i e “food truck” ta ofresé un spesial di $11. Bonaire Culinair ta un oportunidat estupendo pa gosa di eksperensianan úniko ku platonan di establesimentunan rònt Boneiru. 

Eric Gietman, propietario di Cadushy Distillery alabes Presidente di e komishon kulinario di BONHATA ta bisa: “Bonaire Culinair ta ofresé restorantnan e oportunidat pa nan mustra kiko nan tin pa ofresé n’e kliente i di forma aksesibel. Boneiru tin asina tantu i eta riba kaminda pa bira e Kapital Kulinario. Esaki ta nifiká ku bishitantenan awor lo bini isla di Boneiru no solamente pa relahá i gosa di deporte akuatiko, pero tambe nan ta skohe Boneiru pa su diversidat kulinario i kalidat haltu. Awor mi por asta anunsiá ku gran entusiasmo ku “lunch rooms” i “food trucks” tambe ta partisipá pa un representashon mas kompleto di e mundu kulinario di Boneiru.”

Promové

Bonaire Culinar ta un evento pa promové bon kuminda i bebida di nos isla. Despues di un tremendo eksito den mei último tur hende ta kla pa e siguiente evento. Durante di e evento, ta posibel pa skèn kodigo-QR pa asina tin e chèns pa gana un variedat di premio manera e ròm Rincon, un sena pa dos i muchu mas. 

Despues di e último edishonnan di Bonaire Culinair den novèmber 2020 i mei 2021, nos no por warda pa ranka sali ku e evento dia 23 di sèptèmber i hasi di esaki tambe un eksito rotundo. Bonaire Culinair ta un inisiativa di BONHATA, apoyá pa the Bonaire Restaurant Association (BRA) i Tourism Corporation Bonaire (TCB),  ku The Cadushy Distillery komo motor. 

Pa mas informashon i restorantnan partisipante bishitá www.bonaire-culinair.com òf subi e pagina di Facebook ‘BonaireCulinairEvent’ òf Instagram@bonaireculinair. Por fabor hasi bo reservashon adelantá, paso kuponan ta limitá.