KRALENDIJK- Djabièrnè nochi e pueblo di Boneiru por a tuma despedida di Edison Rijna komo  gezaghèber di Entidad Públiko Boneiru (EPB). 

E aktividat a tuma lugá na Parke Wilhelmina. “Nos ta yama Edison Rijna danki pa e añanan ku nos a traha huntu. Edison, su meta tabata pa Boneiru dal stap pa dilanti i el a logra hopi. Nos ta deseá Edison, tur klase di éksito pa su karera nobo. Tur momentu nos ta kla pa yud’e si ta nesesario. Boneiru tin hopi potensial. Danki pa e bunita trabounan i sigur Edison ta keda un persona respetá”, asina diputo James Kroon a bisa den un diskurso. 

Sekretario di Boneiru Christopher Frans, tambe a elogiá e gezaghèber saliente: “Semper Edison a lucha pa Boneiru bai dilanti. E tabata un hende habrí pa tur hende papia kuné. Ta un hende ku ta tuma desishon rápido. Ami a eksperensia i mi a siña hopi di dje. Un hende ku atenshon pa tur hende.”

Gratitut

Edison Rijna mes tambe a papia i a yama tur hende danki. “Un vishon ku mi a hasi 9 aña, bira gezaghèber di Boneiru tabata mi soño. Mi a yega na e posishon sin barba i sali ku barba. Mi wela no tabata ke pa mi traha den e edifisio ei. Ora mi a bai traha den dje mi a haña sa kiko e ta nifiká. Bo no tin dia liber i no por bira malu. Mester ta na kareda ku regularidat”, Rijna a bisa. 

Rijna a bisa tambe ku e tabata mira su tata, Eddy Rijna ku a fayesé resientemente.  “Mi tata Eddy no tei mas pa tende i mira ku mi ta bai for di e funshon komo gezaghèber”. Rijna a yama dank tambe na su pareha, su yunan i su rumannan i tur otro hende ku a sostené den su añanan komo gezaghèber.