KRALENDIJK- Aunke hopi hende no ta para ketu na e echo aki, Boneiru -kalkulá a base di kontagio pa kada 100.000 persona- aktualmente ta e isla ku e grado di kontagio nobo mas haltu den tur isla hulandes di Karibe. Esaki ta sali na kla for di sifranan di RIVM na Hulanda.

Segun RIVM, na Boneiru siman pasá 423 hende pa kada 100.000 hende a tèst positivo pa SARS-CoV-2. Esaki, segun e instituto, ta un kresementu level kompará ku un siman promé, kaminda ku 406 hende pa kada 100.000 a tèst positivo. RIVM ta mustra tambe riba e echo ku e porsentahe di tèst positivo na Boneiru a subi di 9,5% pa 17,0%, o sea ela bira kasi dòbel.

Otro islanan

E islanan di St. Eustatius i Saba pa basta tempu kaba no tin ningun kaso di Covid-19, i no ta interesante den e komparashon aki.

Sinembargo, na Kòrsou siman pasa 219 hende riba kada 100.000 hende a tèst positio pa Covid, na St. Maarten 148 riba kada 100.000 residente i na Aruba asta 85 riba kada 100.000 persona. Esaki ta nifiká ku na Boneiru e grado di kontagio ta kasi dòbel esun di Kòrsou i mas ku 4 biaha mas haltu ku esun di Aruba.