Kralendijk- Boneiru ta bai bèk na nivel di riesgo 2, debí na un kresementu di kontagio riba e isla i tambe debí na e echo ku e variante Delta, ku ta wòrdu konsiderá mas kontagioso, a hasi su entrada na e isla.

Ku no mester bin ku medida mas severo na e momento aki, ta danki na e echo ku e grado di bakunashon riba Boneiru ta hopi haltu. “Tòg tin hende ku no a bakuná ainda, i nos ta hasi un apelashon riba nan pa ainda nan registrá pa esaki”, asina gezaghèber Edison Rijna a bisa en un konferensia di prensa djarason atardi.

Bùbel

E asina yamá bùbel pa viahe entre e islanan ABC pa awor ta keda na vigor. Esaki ta nifiká ku pasaheronan ful bakuná no mester hasi ningun tèst pa por biaha. Rijna a mustra sinembargo ku mester tene kuenta ku e kondishonan di biahe por kamba di un ora pa otro, dependiendo e situashon di kontagio no solamente na Boneiru, pero tambe na e otro islanan.

Baile i kanto

E impakto mas grandi di nivel di riesgo 2 ta baile i kanto. Esaki ta keda prohibí entrante dia 23 di yüli awor. Rijna a splika ku e virus ta plama fasilmente dor di drùpel chikitu ku por plama nèt pa medio di aktividat di baile i kanto. Tambe restorant i gymnan mester bolbe registrá ken ta bishitá e establesimentu.