KRALENDIJK – Bou di e shelu ekstenso Karibense Casper Douma i Cora Knopper, den representashon di e fundashon Blue Defenders NGO, ta riba e mishon pa deskubrí un di e misterionan di e laman rònt di Boneiru. Den nan último ekspedishon, ku ta studia e komportashon di dòlfein i bayena, nan por a hasi deskubrimentunan impreshonante kaba.

Casper Douma, un fotógrafo pashoná di naturalesa, ta splika: “Tabata inkreibel pa mira kon aktivo e laman riba Boneiru ta. Den nos último ekspedishon nos a mira entre otro bayena i dòlfein ku beibi, lokual ta sugerí ku e área aki por tin un funshon di kamber di parto.” Cora Knopper ta añadí: “Nos meta ta ta pa mehorá e medidanan di protekshon pa e Yarari Marine Mammal Sanctuary. E área aki mester ta un haf seif pa mamíferonan di laman.” Douma i Knopper ta dos miembro di ekspedishon i fundadónan di e fundashon Blue Defenders NGO. Ku e fundashon aki nan ta purba haña mas bista di e lamannan rònt Boneiru.

E Yarari Marine Mammal Sanctuary ta relashoná ku e área di laman riba Boneiru. Esaki ta den e parti Karibense di Reino Hulandes. Tin un parti tambe situá den e awanan rònt di e islanan Saba i Sint Eustatius. A lanta e santuario-Yarari pa garantisá protekshon di mamíferonan di laman, manera dòlfein, bayena i turtuga di laman. E ta un parti importante di e inisiativanan di protekshon marino mas ámplio den e área di Karibe, ku tin komo meta pa mantené e biodiversidat den region i protehá kontra piskamentu eksesivo, polushon i tráfiko marítimo. E nòmber “Yarari” ta un palabra Arawak ku ta nifiká “un luga dushi”, lokual ta simbolisá e meta di e santuario: ofresé un sitio seif, protehá pa espesienan marina.

Último ekspedishon 

Durante nan estadia di sinku dia Douma, Knopper i un grupo di boluntario i investigadó a hasi uso di teknologianan avansá, manera hidrófono, pa identifiká e komunikashon di dòlfein- i bayenanan. Knopper ta splika: “I esei a logra. Nos a hasi grabashon di zonido di un grupo di shete bayena. E hidrófononan por persibí e zonido úniko di klek, ku nan ta yama tambe CODA’S, di un bayena. Ku e zonidonan aki riba termino largu nos por bisa algu di e grupo. Nos ta spera ku e datonan por kontribuí na komprenshon di e patronchinan di migrashon. Esaki por kondusí na mihó protekshon di e animalnan aki.”

E miembronan di ekspedishon a hasi investigashon na tur parti di Boneiru. Pa nan e santuario na kosta nort ta keda esun mas interesante. “Bayenanan por ehèmpel mester di un profundidat di 800 meter. Na e profundidat aki nan por yag por ehèmpel riba zekat. Den e santuario Yarari tin profundidatnan grandi, kaminda e espesienan di bayena por ta,” segun Douma. 

Mester di mas protekshon

Mamíferonan di laman ta bou di preshon pa motibu di polushon, molèster di zonido i kambio di klima. 

Ku e konosementu di kantidat, espesie i moveshonnan di megafouna den área Yarari i área di Karibe mas ámplio e fundashon por reforsá medidanan di protekshon den konsulta ku otro organisashonnan di investigashon i gobièrnunan. “Ku e informashonnan ku nos ta haña di e patronchi di migrashon, nos por bisa riba término largu tambe algu tokante di kua parti di e área Yarari nos mester protehá mihó kontra tráfiko marítimo. Por situá por ehèmpel un ‘blue corridor’ kaminda barkunan di transporte ta nabegá banda di dje,” segun Knopper.

Fundashon Blue Defenders NGO

E mishon di Blue Defenders NGO a haña sosten finansiero pa e aña aki di entre otro Fondo di Naturalesa Mundial i Dierenlot. Stinapa tambe ta enbolbí den e proyekto. Bonaire Yacht Charters a pone un boto disponibel. “Tur esaki a hasi ku pa e aña aki nos tabata disponé di e materialnan korekto i por ehekutá e promé dos ekspedishonnan. Pa e aña benidero nos ta en buska di fondonan atrobe. Nos ta agradesido pa e sosten ku nos ta haña. E ta yuda nos pa kontinuá e investigashonnan importante aki,” Douma ta bisa.

Den nan búskeda pa mas konosementu di e medio ambiente marítimo di Boneiru, Douma i Knopper ta pidi tambe yudansa di e habitantenan lokal. “Nos ta pidi personanan pa mèldu opservashonnan di bayena, dòlfein, manta i asta tribon via nos website. Pasobra nos lo ke sa mas di e populashon di tribon tambe,” Knopper ta bisa. Esaki por aportá ku informashon balioso ku por yuda nos pa protehá e animalnan aki.”