Kralendijk – Boneiru a alkansá un logro importante awor ku 80,5 % di personanan di 18 aña bai ariba a pasa minimalmente un angua kontra corona. Awor akí 13.113 hende ta kompletamente bakuná, esaki ta 69,2 %  di e grupo di enfoke di 18 aña bai ariba.

Den e grupo di edat di 12 te ku 17 aña 23,9 % a pasa angua minimalmente un biaha. E meta ta pa finalmente 85 % di personanan di 18 aña bai ariba i hóbennan den edat di 12 te ku 17 aña ta kompletamente bakuná.

Den luna di yüli i ougùstùs habitantenan por pasa e promé òf e di dos angua riba djasabra. Esei por na Kompleho Deportivo Jorge Nicolaas di 09:00 – 14:00 or. Djasabra 24 di yüli 2021 mas òf ménos 300 hende a pasa angua na e sentro deportivo. Awor ku e variante di dèlta ku ta mas kontagioso ta na nos isla, ta importante pa hendenan ku ainda no a pasa e promé òf e di dos angua hasi esei ainda. Pa hendenan ku ta kompletamente bakuná e chèns ta chikitu ku nan ta bira gravemente malu den kaso di kontagio.

Sufisiente

Nos isla tin sufisiente bakuna di Pfizer pa sòru pa bakuná mas tantu hende posibel. Habitantenan ku tin pregunta tokante e bakuna por yama 0800 0900 grátis durante ora di ofisina. Na e number ei hende por traha un sita pa pasa angua kontra corona.