KRALEDNIJK- Boneiru a anunsiá un kolaborashon ku Condé Nast Traveler, un di e presentadónan di relato di biahe mas prominente na mundu. E kolaborashon akí ta un tremendo oportunidat pa mustra e bunitesa i kultura vibrante di Boneiru.

Ku 8.3 mion siguidó riba medionan sosial i 3 mion abonado di imprenta, Condé Nast ta hunga un ròl krusial den e industria di biahe. Sea ku nan siguidónan ta buskando e último informenan tokante biahamentu òf e mihó sitionan pa bai kome na e destinashon di nan soño, kada biaha di nobo Condé Nast Traveler ta proba ku nan ta e mihó fuente di informashon pa hendenan ku ta bai ku vakansi.

‘Esaki ta forma parti di nos strategia di merkadeo 100% digital. Nos ta alehá for di e espasio tradishonal pa hasi propaganda, i nos ta sòru pa tur nos esfuersonan ta kuadra ku e karakter úniko di nos destinashon i nos komunidat’, asina direktor di TCB Miles Mercera  E kolaborashon akí ta konsistí di un kampaña riba medionan sosial ku ta dura tres siman, esta for di 8 di sèptèmber 2022 te ku 30 di sèptèmber 2022 den koherensia ku lansamentu di Boneiru su wèpsait nobo. Condé Nast ta bai publiká un seri di pòst di medionan sosial ku promoshon riba nan accountnan ofisial di Facebook i Instagram, hasiendo uso di imágennan i kopianan di e kampaña nobo di marka.

Dos fase 

E kolaborashon lo ranka sali den dos fase. Condé Nast ta lansa e promé parti di e kampaña ku un video di 15 sekònde den kua ta tira lus riba e mihó karakterístikanan di Boneiru. Den e di dos fase ta aserká e gruponan di enfoke enbolbí di nobo ku avisonan di karusèl. En total e kampaña ta enserá mas ku 178.000 ‘view’ garantisá di video i 3500 ‘click’.

E kolaborashon akí lo inspirá bishitantenan bieu i nobo for di henter mundu pa bishitá Boneiru i mira e abundansia di bunitesa ku nos isla tin di ofresé.