KRALENDIJK – No opstante ku e okupashon promedio di hotèlnan na Bonaire ta mustrando un imágen relativamente stabil, tin un tendensia negativo visibel den e preis promedio ku hotèlnan ta kobrando klientenan. 

Esaki a sali na kla for di un presentashon siman ku a pasa, di e direktor di Bonaire Hotel and Tourism Association (BONHATA), Veroesjka de Windt. Kaminda e preis promedio pa un kamber na 2023 ainda tabata di 239 dòler, e preis promedio pa un kamber den e promé kwartal di 2024 a baha te na 223 dòler pa anochi. 

BONHATA ta premirá ku e tendensia negativo lo kontinuá den di dos kwartal, kaminda e preis promedio pa un kamber lo yega alrededor di 177 dòler pa anochi. Durante e mesun periodo na aña 2023, esaki tabata 201 dòler pa anochi ainda. 

Muchu oferta

Remarkabel ta ku e preis mas abou ku ta realisando pa kamber, pa anochi, no ta wòrdu kousá dor di ménos turista ku ta yegando nos isla. E sifranan di TCB al kontrario ta mustrando ku nunka antes tabata tin tantu turista di estadia ku a bishitá e isla. 

Segun De Windt, e bahada den e preis promedio di un kamber ta wòrdu kousá dor di e kantidat grandi di kambernannan ku a wòrdu agregá den e añanan tras di lomba.

Baha preis

Hopi hotèl ta bahando nan preisnan, pa mantené e okupashon na un sierto nivel. E okupashon promedio tabata 74% den e promé kwartal, meskos ku un añu pasá.