Kralendijk – E plan pa drecha mas kaminda na Boneiru ta kla. E kamindanan ku nan ta bai traha riba dje den e temporada binidero ta konosí. E úniko kos ku falta awor akí ta e último parti di e sèn ku Hulanda a primintí pa ehekutá e programa di kaminda (wegenprogramma), asina Entidat Públiko Boneiru ta bisa den un komunido pa prensa.

Ministerio di Infrastruktura i Maneho di Awa (I & W) ta finansiá e programa di kaminda. E ministerio ta depositá e sèn pa e kamindanan den diferente parti riba kuenta di banko di Entidat Públiko Boneiru. Esaki ta sosodé entre otro a base di progreso di e programa. Na e momentu aki Entidat Públiko Boneiru ta sperando riba e siguiente parti, di manera ku por ehekutá e programa segun e planifikashon ku nan a presentá. Awor akí ya kaba renobashon di Kaya Commerce ta den pleno marcha. E siguiente kamindanan ku nan ta bai kuminsá kuné ta  Kaya Hermandad, Kaya Gramel  i Kaya Neerlandia.

Fondo

Den e akuerdo di gobernashon di 2017 a disidí pa strukturalmente pone 5 mion euro disponibel pa eksplotashon di infrastruktura físiko na islanan BES for di 2018 te ku 2033. A stipulá un norma pa repartishon di manera ku tur aña ta reservá 2,75 mion euro pa Boneiru pa eliminashon di e retraso den mantenshon di e kamindanan.

Mester hasi uso di e medionan na un manera efisiente i efikas sí. Pa e motibu aki for di Den Haag (ministerio di Infrastruktura i Maneho di Awa) tur aña ta hasi un evaluashon a base di efisiensia i efikasia di e medionan. Na aña 2019 Boneiru a risibí e medionan pa promé biaha pa 2018 i 2019. Un suma total di 5,5 mion euro. Mas aleu na aña 2019 Boneiru a risibí un impulso pa un biaha so di 3 mion euro pa e kamindanan rònt di e skolnan. En total Boneiru a risibí pues 8,5 mion euro pa e kamindanan. Importante pa menshoná ta tambe ku a hasi un palabrashon ku e islanan por hasi petishon pa medionan pa e próksimo 4 aña, di manera ku nan tin un suma mas grandi pa por kuminsá ku proyektonan grandi di kaminda tambe.

Pa e motibu aki Boneiru a entregá un petishon pa medionan na rason di 11 mion euro pa 2021 te ku 2023. E suma akí no ta bini den un solo transakshon, pero nan ta pag’é den diferente parti. Na luna di yüli 2021 nan lo hasi un transakshon di 3 mion euro. Na fin di 2021 i durante 2022 e fondonan ku ta resta lo sigui. Ku e fondonan aki ta renobá en total 18 kaminda kompletamente (wak e komunikado pa prensa anterior). Na aña 2022 lo hasi un petishon pa e periodo di 2024 – 2028. Den kaso ku e trabounan kana rápidamente, kisas lo por hasi un apelashon riba e fondonan akí mas promé.

Tim di programa

Pa por hasi uso na un manera efisiente i efikas di e medionan, na fin di aña 2020 a formulá un programa, e Programa di Mas Aña pa Kamindanan di Boneiru (Meerjarenprogramma Wegen Bonaire – MJOP). Pa ehekushon di e programa akí a lanta un tim apart, pa kua a kontratá vários profeshonal eksterno. E munisipionan Rotterdam i Alphen aan de Rijn ta aktua komo konsehero.

Banda di planifikashon i realisashon di renobashon di e kamindanan e tim ta dirigí su mes entre otro tambe riba mehorashon di proseduranan atministrativo i finansiero, komunikashon i organisashon di un sistema profeshonal pa maneho di kaminda (Gisib), den kua ta inkluí tur informashon di tur kaminda na Boneiru; den esaki e tim ta traha huntu ku e kompanianan di utilidat. E tim ta dirigí su mes tambe riba formulashon di e plan di término mas largu (2023 i mas aleu) pa renobashon i mantenshon di e kamindanan.