WILLEMSTAD – Ta parse ku e bringamentu na Marnixschool na Cas Coraweg no ta e úniko insidente e siman ei. Segun bosero di polis Maurits Rosalina a informá na Èxtra, su koleganan mester bai skolnan ku regularidat pa intervení. 

E bosero ta pidi tambe reservashon pa loke ta trata filmamente i plamamentu di bringamentunan na skol via medianan sosial. Polis ta preferá ku esei no sosodé mes mas, pasobra e imáhennan por tin konsekuensia pa e víktimanan.

Direktiva di skol di VPCO, bou di kua Marnixschool ta kai, ta di akuerdo ku esei. Pero e no ta rekonosé su mes den e imáhen ku ta krea ku e ta sosodé hopi. En todo kaso no riba e skolnan di VPCO.

Loke ta hasi e kaso di Marnixschool ekstra fèrfelu ta ku segun e famia ta trata aki di un bringamentu ku ta resultado di tèrmentu konstantemente di nan yu na skol.

VPCO no ta duna komentario den e kaso spesífiko aki ku no ta solamente ku nan ta investigando e insidente i ku nan a suspendé temporalmente e alumnonan ku tabata embolbí.