KRALENDIJK- Ounke tin hopi kompania di aviashon Merikano ta bulando Boneiru kaba, e buelonan di JetBlue lo por hasi un diferensia pa mas ku un motibu. 

Pa di promé e echo ku e buelonan ta sali for di e aeropuerto JFK di New York. JetBlue ta e úniko aerolinea ku ta bula for di e aeropuerto aki, stret pa Boneiru. E di dos diferensia ta e orario. Dor di e ora di salida trempan, ta yega Boneiru trempan tambe. 

Pero e parti mas importante ta ku JetBlue ta konosí pa su preisnan abou, ku ta kai hopi bou di esnan di kompetensia. Pa suprayá esaki e aerolinea a introdusí un preis hopi spesial mes di 99 dòler pa un trajekto, o sea di 198 dòler bai bin. Esaki ta por lo menos mitar di loke otro kompanianan eksistente ta kobra. 

“E servisio nobo di JetBlue pa Boneiru ta suprayá JetBleu su kompromiso ta duna e biahero un  eksperensia di bishita ekselente, ku un enfoke riba ruta di rekreo i VFR (bishitá amigunan i famia), manera nos  strategia JetForward ta delineá” asina un bosero pa e kompania a bisa djamars. 

E ruta di Boneiru ta e di 34 destino di JetBlue for di New York pa destinashonnan den Amerika Latina i Karibe. Pa loke ta trata loke ta distinguí JetBlue for di e kompetidornan, e aerolínea ta mustra riba e echo ku a pesar di preis barata, ta ofresé internet na bordo di forma gratuita, ta parti bebida i pasaboka gratis i tin pantaya ku pelíkula na kada asiento. 

Importante

“E echo ku nos por yama bon biní na JetBlue komo partner di aviashon ta marka un paso importante den nos kompromiso pa hasi nos bunita isla mas aksesibel pa biaheronan norteamerikano”, direktor di TCB, Miles Mercera, a bisa den reakshon riba e promé buelo.