KRALENDIJK – E sentro pa promové negoshi serka hóbenan emprendedó Businesspark, den koperashon ku diferente empresarionan lokal, a produsí un video promoshonal ku ta enkurashá konsumidó pa hasi negoshi ku empresarionan lokal riba e isla.

E video, kaminda por mira dos spesialista di beyesa i un produktor di muzik  ta pidi habitantenan pa gasta nan plaka ku empresarionan di mes e isla. Segun Jermainy Diaz, gerente di Businesspark, esaki ta solamente e promé di na tur tres video ku ta yama atenshon pa e importansia di sostené empresarionan lokal.

Kurason i alma

“Empresarionan lokal ta inbertí nan kurason i alma den Boneiru, i nan ganashi ta keda aki,” por skucha den e klep kòrtiku. “Sostené nos empresarionan lokal. Kumpra lokal i yuda empresarionan hóben realisá nan soño empresarial. I ban protehá nos merkado lokal,” Diaz ta bisa na final di e video ku por sierto ta un produkshon kolorido i bunita.