KRALENDIJK- Cadushy Distillery na Rincon ta introdusí un whisky spesial ‘Captain Don’s Limited Edition’. Segun e propietario Eric Gietman di Cadushy Distillery, ta un edishon spesial na honor di e legendario Captain Don Stewart.

Pa su inisiativa, Gietman a risibí un plaketa for di Profesor George Buckley di Harvard University. E plaketa ta kontené un fragmento di e boto di zeil di Captain Don. Buckley, un autoridat renombrá den preservashon históriko, ta kustodio di e herensia di Captain Don.

Captain Don Stewart, konosí komo “Captain Don”, tabata un persona visionario pa loke ta trata protekshon di medio ambiente i spesialmente e refnan di Boneiru. “E whisky, un tribut na e bida remarkabel di Don Stewart, ta un meskla di barilnan selektá ku ta ofresé un perfil di sabor úniko ku nota di fruta tropikal, un pista di speserei i un sabor suave”, asina Gietman ta deskribí e produkto nobo.

Gietman a ekspresá tambe su gratitut pa e rekonosimentu di Buckly i a demonstrá su entusiasmo pa presentá un whisky spesial manera esaki na mundu. “I ainda mas, un whisky ku ta kapturá e spíritu i logronan di Captain Don”, Gietman ta bisa ku orguyo.

Mundiálmente disponibel

Captain Don’s Limited Edition Whisky ta disponibel mundiálmente for di 22 di yüni 2023. Un parti di e ganamentu di kada botèl bende lo kontribuí na esfuersonan di protekshon di naturalesa na Bonaire.