WILLEMSTAD – E boto di bela di tres master di Uruguay, Capitán Miranda, ta pasa Kòrsou atrobe fin di e luna aki. E bishita ta dura e biaha aki kuater dia. No ta konosí ainda unda e ta mara.

Ta spera ku e barku ta drenta haf dia 28 di aprel. Ta trahando riba un programa, kaminda ku banda di e aktividatnan regular lo invitá e promé dia sierto skolnan na bordo i despues e públiko grandi por bin tira un bista na bordo e tres dianan despues.

A konstruí i baha Capitán Miranda na awa na aña 1930 na Cadiz, Spaña, i el a kuminsá su karera komo barku di tranporte. Su nòmber ta inspirá pa e hidrógrafo kapitan Francisco Miranda (1868-1925) ku a sirbi Uruguay komo ofisial di gabinete,  sekretario di guera i despues profesor den geografia marítimo na Akademia Marítimo di Uruguay. 

Te ku 1978 a uza Capitán Miranda komo barku di investigashon hidrográfiko. Despues el a haña un remodelashon grandi, spesífiko pa formashon di bela di marina di Uruguay. E tin lugá pa un tripulante fast di alrededor di 30 hòmber i muhé.

Normalmente e barku di entrenamenu tin alrededor di 80 aspirante hóben (ofisial den entrenamentu) na bordo, ku mester dominá e bida i trabou riba e barku di bela aki. E barku ta 64 meter largu i 32.40 meter haltu ku un profundidat di 4 meter.

E barku a bini Kòrsou diferente biaha, manera fin di luna di yüni, komienso di luna di yüli 2019 ora ku e barku a pasa Kòrsou pa Dia di Bandera. Aña pasá tambe Capitán Miranda tabata forma parti  di regatta Velas Latinoamérica 2022, ku a tuma lugá den bahia di Kòrsou di 7 te ku 13 di yüni.

Hustamente pa motibu di e rekuerdonan agradabel di e promé bishitanan marina di Uruguay a aserka e asosiashon di bela CSF pa por bini atrobe na luna di aprel di e aña aki. Despues di Kòrsou e barku di bela ta sigui pa Estados Unido i mas despues pa Europa kaminda na fin di luna di yüni próksimo e barku ta forma parti di Sail Den Helder 2023