WILLEMSTAD – Caribbean Petroleum Refinery ta desmentí ku e ta burla di sanshonnan di gobièrnu Merikano na e terminal pa transferí zeta na Bullenbaai. Esei e operadó nobo di refineria Isla na Kòrsou ta informá. 

E informashon di Associated Press ku e zeta na Bullenbaai lo ta prosedente di Venezuela no ta korekto segun Caribbean Petroleum Refinery. E zeta krudo di e tènker ‘Colon’ tabata pago pa un debe ku tabata habrí i ku Venezuela mester a paga na tersera.

Caribbean Petroleum Refinery ta simplemente hür e fasilidatnan na Bullenbaai na e tersera ei.

Segun Caribbean Petroleum Refinery ta importante pa remarká ku e sanshonnan aktual ku a imponé riba Venezuela no ta prohibí e pais pa paga su debenan na tersera ku zeta krudo òf produktonan derivá di zeta krudo.

E sanshonnan ta prohibí e negoshi entre Repúblika Bolivariana Venezuela i su empresanan estatal na un banda i entidatnan Merikano i su siudadanonan na otro banda, segun Caribbean Petroleum Refinery.

Bullenbaai

Ta hür e tankinan di almasenahe na Bullenbaai di e empresa públiko Refineria di Kòrsou, ku ta doño di tantu e refineria komo e terminal di transferensia.

Ta hür e fasilidatnan di almasenahe na Bullenbaai di buena fe, segun e kompania. Den e kalidat aki Caribbean Petroleum Refinery no ta okupá su mes ku benta di zeta krudo òf di tur produkto derivá di zeta krudo.

Caribbean Petroleum Refinery ta bisa ku firmamentu di un akuerdo riba liñanan general ta un kestion di tempu i ku despues di esei ta bai traha riba un kontrato di hür di e refineria.