KRALENDIJK – Fundashon Tienda pa Konsumido Boneriano (FTPKB) a hasi komparashon di preis den 17 supermerkado na Boneiru. Lamentablemente, e tres supermerkado, Dragon City na Antriol (ántes Progresso), Lian Xiang i Foody Markt, persistentemente no ta dunando nan koperashon na e komparashon di preis. 

Den e komparashon Caribe Nobo ta mantené su posishon komo number 1 i ta ofresé un kantidat amplio di produktonan básiko na preisnan hopi atraktivo. Ku mas ku 10 produkto mas barata- ku e otro dos suoermerkadonan ku ta den e tòp 3 di supermerkadonan mas barata, Caribe Nobo ta ofresé 29 produkto for di e lista básiko di FTPKB. Por spar un suma total di 86 dòler ku 14 sèn. Ku esaki un sparmentu signifikativo di mas ku 40% kompará ku e preisnan mas haltu na otro supermerkadonan pa produktonan similar. For di e kategoria di fruta i berdura Caribe Nobo a resultá ku e mayoria opshonnan di preisnan mas abou.

Bondigro Supermarket a keda riba e di dos lugá. Pa e 19 produktonan for di e lista básiko Bondigro a realisá un sparmentu finansiero total di 66 dòler ku 79 sèn, ku ta mas o ménos 46% mas barata ku e preisnan mas karu na otro Supermerkadonan. Tambe den kategoria di fruta i berdura Bondigro tin mayoria di e produktonan di preisnan mas abou for di e lista básiko. Ademas, Bondigro ta ofresé un kantidat di produkto di marka di kas relativamente haltu, ku hopi bia ta mas barata kompará ku otro lugá. Bondigro su produktonan hopi biaha ta di e marka Gwoon.

Warehouse a keda na e di tres lugá ku 1 produkto ménos ku Bondigro. Pa e 18 produktonan  básiko  Warehouse a realisá un total 49 dòler ku 92 sèn, ku por spar ku ta representá 46% kompará ku e preisnan mas karu na otro supermerkadonan. Warehouse a mustra e preisnan mas abou den e kategoria di fruta i berdura i e kategoria di produktonan di marka di kas.

Konklushon

Caribe Nobo, Bondigro i Warehouse a demostrá di ta den tòp 3 di supermerkadonan di mas barata ku ta ofresé konsumidónan opshonnan atraktivo pa produktonan básiko ku un enfoke fuerte di preisnan kompetitivo  den diferente kategoria di produkto. 

Den e temporada ku fruta i berdura su preisnan sigi oumento nan keda ofresé esaki nan na preisnan mas atraktivo   E resultadonan ta enfatisá e balor di e supermerkadonan aki komo opshonnan faborabel pa hasi kompra for dje lista básiko. FTPKB ta konsehá Konsumidónan pa kumpra na un forma inteligente, i pa usa e investigashonnan di preisnan aki pa optimalisá nan presupuesto di kumpra.