WILLEMSTAD – Djabièrnè 24 di juni último departamentu di Parkenan Marina di Carmabi a instala e promé buinan na Parke Marina Curaçao (Territorio Spaw 1) na Oostpunt. Carmabi ta pone e buinan di manera ku piskadónan i otro bishitantenan di parke no tin mester bai ankra mas den e Parke Marina. E buinan por wordu husá pa ankra di un manera seif na e parke bou di awa i for di einan por piska of sambuyá.

Carmabi tin e Parke Marina bou di maneho for di 27 di novèmber 2020. E meta di e maneho ta pa protehá e refnan di koral presente.

Carmabi a kuminsa ku ponementu di e promé kuater buinan blanku destiná pa sambuyadónan, pa no kousa mas daño na e bida bou di laman. Na total lo pone diessinku bui blanku pa sambuyadónan.

E buinan ta diseña di tal manera ku nan no por lòs ni no ta un problema pa medio ambiente. E buinan destiná pa sambuyadónan ta di fèrf kolor blanku i tin un pipa ta sali ku un haltura di mas o menos 70 cm pa un mihó visibilidad.Aparte di esei e buinan ta kontené teip reflector ku ta hasi e visibilidad aun mas mihó den sukú.E buinan ta kontene un kabuya hel ku un kònòpi kaminda e botonan por mara. Aparte di e buinan blanku lo bini dies bui hel, mas lat durante aña, na sitionan di piska kaminda piskadónan por mara i piska, i ta bini dos bui ku ta marka e komienso i final di e Parke Marina.

E buinan ta wordu posishoná di tal manera ku tur hende por hasi uso di nan. Carmabi ta pidi tur sambuyadó, piskadó i bishitantenan di e parke pa hasi uso di e buinan i no tira anker mas den e area.