WILLEMSTAD – Banko Sentral di Kòrsou i Sint Maarten, CBCS, no ta rekonosé su mes  ètòl  den e ekspreshonnan di Nina Ansary den media. Segun e Banko nan no ta kuadra ku bèrdat i nan ta kalumnioso.

E yu muhé di Hushang Ansary ta bisa ku Banko Sentral ta nenga di duna e empresanan restrukturá Ennia i Banco di Caribe, ku a bende na e United Group Holding di Gregory Elias bou di e areglo di urgensia, bèk na e akshonistanan. Méskos ku SunResorts (Mullet Bay) na Sint Maarten.

Ta sinta e Banko duars ku e ta presentá su mes komo un persona karitativo sosial, méskos ku su tata. ‘Mientras un wes independiente den reino Hulandes a opiná ku motivashon ku e, méskos ku su tata, a hasi su mes kulpabel na echonan ilegal kontra Ennia i su aseguradonan’, segun e Banko.

CBCS ta rekordá ku a sentensi’é na pago di un indemnisashon di mas ku 945 mion florin. Despues wesnan independiente den Estados Unido a dikta sentensianan na fabor di Ennia, representá pa Banko Sentral

E remarkenan en kuanto benta di Banco di Caribe for di e grupo di Ennia no ta kuadra ku realidat i ta kalumnioso, e Banko ta bisa. ‘A yega na e benta aki despues di a hiba un proseso profeshonal i kuidadoso kaminda CBCS a haña asistensia di ofisinanan kompetente i internashonalmente renombrá di Hulanda i Estados Unido.’